موضوع شامل عن الوحدات داخل الادارات الطبية المختلفه لاطباء التكليف الجدد

موضوع شامل عن الوحدات داخل الادارات الطبية المختلفه لاطباء التكليف الجدد
السلام عليكم ورحمة الله وبركاته

في الموضوع ده ان شاء الله كل زمايلنا من

اطباء التكليف القديم

يساعد زمايله من اللي


بيقدمو حاليا في التكليف ..
(اطباء التكليف الجدد)

في اختيار وترتيب الادارات الصحية

- من حيث الاسوأ والاحسن

- الأبعد والاقرب من القاهرة

- مدير الادارة كويس ولا وحش

- التفتيش كتير ولا قليل

- التقييم والحوافز منتظمة ولا لا


اي دكتور خد تكليفه في محافظة معينة يوصف الادارات اللي فيها كلها

سواء في الادارة نفسها .. او من حكاوي زمايله عن الادارات الاخري..



وان شاء الله الموضوع ده يبقى مرجع لكل زمايلنا التكليف الجديد

ويقدرو يستفيدو منه ..

ادارات محافظة الشرقية

محافظة الشرقية عموما .. هيه محافظة تبعد عن القاهرة مابين ساعة لساعتين وفي المدن البعيدة حوالي تلات ساعات .. مواصلاتها للقاهرة كويسة ومتيسرة 24 ساعة
وكيل الوزارة الدكتور: سيد ابو الخير .. راجل محترم الصراحة
وبينصف الطبيب ضد جبروت مديري الادارات .. وبيدي نمرته لاي دكتور تكليف عشان يستقبل اي شكوى
الادارات ( الزقازيق - ههيا - ابو كبير - فاقوس - الحسينية ) دول على خط واحد
(منية القمح وبلبيس ) خط لوحده
( كفر صقر واولاد صقر ) خط لوحدة
مشتول السوق : مش عارف فيها ادارة ولا لا ( بس هيه قريبة جدا جدا من القاهرة )



ادارة الزقازيق (( الادارة اللي فيها بتاخد مجاميع عاليه عشان اوائل الدفعة في الجامعة بتكون هيه اول رغباتهم ))
التفتيش فيها بيبقى شديد عشان قرب المديرية والمحافظة
المواصلات من القاهرة سهله وكويسة



ادارة ههيا ادارة كويسة وقراها مش متطوحة .. بس التفتيش عليها شديد شوية عشان قرب الزقازيق


ادارة ابو كبير (( من الادارات الكويسة والتفتيش عليها حنين .. وبرضه مش فيها تطويح ))


ادارة فاقوس (( ادارة وسط )) مدير ادارتها راجل محترم .. وفيها وحدات متطوحة جداااا .. وفيه وحدات قريبه .. يعني ممكن ممكن تروح اماكن مستريحة وومكن تروح اماكن مالهاش مواصلات
التفتيش فيها على حسب القرب من الادارة .. بعيدة عن القاهرة حوالي ساعتين


ادارة الحسينية: اياك اياك اياك ثم اياك .. ادارة مدير ادارتها رهيب .. هو طالع معاش قريب بس اللي بعده افظع منه .. الحسينيه فيها وحدات في الجبل .. اغلب وحداتها مالهاش مواصلات
فيه وحدات ممكن تركبلها اربع وخمس مواصلات
التفتيش عليها على حسب مزاج مدير الادارة ..
نصيحة .. للي من الشرقيه او خارجها .. ابعد عن ادارة الحسينية نهائي
الحسنة الوحيدة اللي فيها ان فلوسها شبه منتظمة


ادارة اولاد صقر وادارة كفر صقر : من الادارات القريبة من محافظة الدقهليه ..
اقرب للمحافظات الاخرى منها لمدن الشرقية ..
يعني اللي من الشرقية تبقى الادارتين دول اخر رغباته في المحافظة .. التفتيش عليها شبه يومي .. .. حوافزها غير منتظمة .. وليا زمايل فيهم لسه مش خدو تقييم شهر 10 و11 و12 لحد دلوقتي




ادارة منية القمح وادارة بلبيس ...اقرب ادارتين للقاهرة .. ماعرفش عنهم معلومات الصراحة


بالنسبة لادارة فاقوس

مدير ادارتها راجل محترم جدا جدا د / محمد عبدالله ومابيحبش يئذي حد

الواسطة هيه المحرك الاساسي في اي مكان .. لان مش مدير الادارة لوحده اللي بيمشي الامور .. عندك تلاته مهمين تحته هم اللي فعليا بيحركو الامور
المدير المالي .. رئيس شئون العاملين .. شئون التنقلات

فبالتالي .. الواسطة ليها دوور كبير معاك

طبعا بيبقى صعب اوي تروح مكان كويس في الاول .. لان غصب عنه لازم يملى الوحدات البعيدة الاول .. لو سابها للوسايط هو اول واحد هاينضر

فلازم تصبر لحد مالوحدات البعيدة تتملي الاول .. وبعد كده بيبقى سهل تروح اي مكان انت عايزه

بالنسبة لوحدات فاقوس .. ففيها اماكن متطوحة اوي .. وفيها اماكن قريبة

الوحدات اللي اوعى حد هناك يقنعك تروحها لان مالهاش مواصلات اساسا ..
محمد علي
كفر الاشقم
العزازي الجديدة
الخطارة
اوعى حد يقنعك تروحهم لانهم منفى

دي وحدات بعييييدة ومواصلاتها غير ادمية
جزيرة النص
النحاسين
النوافعة
بني صريد


فيها بقى وحدات في المدينة نفسها ودي لصفوة الصوة
وحدة كفر محمد اسماعيل
مركز صحة المراه
مكتب الصحة

فيه وحدات قريبة وكويسة
الزاوية
كفر شاويش
البيروم ( عليها تفتيش جامد )
الفدادنة ( تفتيش )
النمروط ( فاتحة جديد )( مركز طب اسرة )
الديدامون
فيه وحدات يعني ماتقدرش تقول عنها حلوة ولا ولا تقول وحشة
سوادة
العزازي
الصالحية القديمة
جهينة
نعمان
العرين
الاخميين

مستشفيات تكامل زي :
مستشفى الغزالي التكاملي
مستشفى الهيصامية التكاملي
مستشفى الروضة التكاملي
مستشفى الصوالح التكاملي
مستشفى قنتير التكاملي ( دي مش ماتكد منها )
وكل ده هايتلغى في 2009 وهايبقى مراكز طب اسرة

فيه مركز صحة واحد وصحة اتنين بالصالحية الجديدة .. وده بعيد اوي .. ومشوار وعليه تفتيش

بالنسبة للشرقية الحد الادنى من المجاميع كانت تقريبا 72 %








بني سويف

اقرب محافظات الصعيد الي القاهرة(ساعن ونصف الي ساعتين بالقطار او الميكروباز)

عموما المواصلات سهله لكن لو هتقضيها قطر يبقي احجز قبل سفرك بيوم ع الاقل الميكروبازات 24 ساعه من والي القاهرة

الادارات من الشمال الي الجنوب

الواسطي: واحده من أسوأ الادارات سواء من حيث اهل الواسطي نفسها اللي غاويين مشاكل ومبيحبوش الاغراب بشكل عام ...انتهاءا الي التفاتيش والفلوس اللي بتتخصم ولو مخصموش يبقي ع الاقل الفلوس هتتأخر اوى

الوحدات فيها كتير بعيد يعني هتركب مواصلتين ده اساسي الي الواسطي ومنها الي مكان وحدتك

ناصـــــــــــــــر: بينها وبين مدينه بني سويف نفسها اقل من عشرين دقيقه
اهلها عموما طيبين ...بس فيها وحدات بيتعدى لها بمعديه وجو كده
الادارة هناك مش وحشه متوسطه لا هي زى بني سويف ولا وشحه زى الواسطي والفشن

بني سويـــــــــف نفسها: احسن الادارات علي الاطلاق (رغم ان مدير ادارتها احيانا بيتقومله شعره كده بس بجد طيب وبيعدى)

مشكلتها التفتيش كتير سواء من الادارة نفسها او المديريه واحيانا المحافظه كمان

الوحدات مجهزة كلها وممتازة واللي عاوز يقضيها برايفت هيعيييييييييييييييييييش

عادى جدا انك تبقي بتيجي تلات اربه ايام في الاسبوع المهم محدش يشتكي منك وتظبط امورك

لو اكتر من واحد في الوحده يبقي فل جدا هتعيييييييييييشوا

الفلوس كويسه جدا واقل الادارات في تأخير الفلوس

المواصلات الي جميع الوحدات سهله وابعد وحده تبعد نص ساعه عن المدينه ودى استثناء رهيييييييييب يعني

اهناسيا: بلد د احمد سرنجه يتكلم عنها احسن مني
بس هي اقرب مركز الي المدينه نفسها
ادارتها سمعتها مش ولا بد ومديرها رخم
اجمالا اهل اهناسيا مشهورين بالطيبه

سمسطا:وحداتها بعيده جدا وفي منها في الجبل
اهلها طيبين جدا جدا جدا
معرفش حاجه عن ادارتها بصراحه

الفشن و ببــــــــــــــــا: من الاخر متكتبوش الادارتين دول ومش هنتكلم علشان منغلطش في حد

ان كان ولا بد يبقي الفشن ارحم بس ابعد اوى اللهم ان كنت من الصعيد يبقي هي اقربلك طبعا





محافظه الدقهليه

محافظه كبيره وفيها العديد من المراكز:
http://www.egydr.com/forum/link/m.php?id=60094
http://www.egydr.com/forum/link/m.php?id=43874
http://www.egydr.com/forum/link/m.php?id=64659
http://www.egydr.com/forum/link/m.php?id=12545
http://www.egydr.com/forum/link/m.php?id=81827
http://www.egydr.com/forum/link/m.php?id=22598
http://www.egydr.com/forum/link/m.php?id=68554
http://www.egydr.com/forum/link/m.php?id=86191
http://www.egydr.com/forum/link/m.php?id=60956
http://www.egydr.com/forum/link/m.php?id=63011
http://www.egydr.com/forum/link/m.php?id=54284
http://www.egydr.com/forum/link/m.php?id=63475
http://www.egydr.com/forum/link/m.php?id=21165
http://www.egydr.com/forum/link/m.php?id=60882
http://www.egydr.com/forum/link/m.php?id=76071

طبعا نبدأ بالعاصمه اللي هي المنصوره

بديهي انها محط الانظار وموضع الجامعه والمديريه

تبعد ساعتين عن القاهره

صعب جدا جدا ان حد يتكلف فيها ومن الاخر وكيل الوزاره بيطلع قرار

ممنوع التوزيع في المنصوره وطلخا

مقفولين تماما

ده حتى احنا كنواب صعب نتوزع هناك الا بواسطه محترمه


وبعد المنصوره نتكلم عن طلخا

طلخا لا تبعد عن المنصوره سوي خمس دقايق بالسرفيس

فهي تعتبر جزء من المنصوره

أيضا صعب التكليف فيها وان لم يكن بنفس صعوبه المنصوره

اتكلمنا عن المنصورة وطلخا اللى هية اساسا بتبقى متقفلة
اكلمكم عن دكرنس
تبعد نص ساعة عن المنصورة...القرى بتاعتها فى منها جنب المنصورة يعنى ممكن ربع ساعة من المنصورة تبتدى القرى بتاعة دكرنس...اكيد كمان فى بعد دكرنس قرى تباعها
بيتهيالى ادارة كويسة....بيراعوا الاغراب يعنى..وفلوسها كمان كويسة ..يعنى الحوافز بتتاخد عادى
ادارة منية النصر على بعد ساعة الا ربع من المنصورة...اسمع انها ادارة ربنا اللى يعلم بيها
اسمع انهم صعبين شوية
ادارة ميت سلسيل...على بعد ساعة من المنصورة...اصحابى مش بيشتكوا منها
ادارة الجمالية...اسمع انها ادارة محترمة على بعد ساعة وربع من المنصورة
ادارة المنزلة... على بعد ساعة وتلت من المنصورة.....بس مشكلتهم انهم علشان بعيد فدايما عندهم عجز فى الاطباء فممكن كل شوية يودوكوا فى وحدة بيفسحوكوا يعنى
وبتبقى مشكلة علشان حد يخلى او يبدل او الكلام دة يعنى اللى بيروح هناك هيلزق استحالة يستغنوا عنه (فى ميت سلسيل والجمالية والمنزلة والمطرية)
ربنا يوفقكم ياجماعة

من الاخر

منصوره وطلخا لو اتكلفت فيهم يبقي كويس لكن صعب جدا ولذلك انساهم تماما

ميت غمر بيفضلوها بتوع القاهره لقربها من القاهره وكمان اداره مش وحشه

يلي ميت غمر في القرب من القاهره هي اداره اجا وهي اختيار نموذجي

يعني اصحابنا اللي اتوزعوا هناك كانو زي الفل

طبعا اتفقنا انك مش هتروح حتت زي المنزله والجماليه وميت سلسيل

لانهم اولا بعاد عن المنصوره تحس اساسا انهم خارج المحافظه

وثانيا لان اللي هيروح هناك صعب جدا يتحرك لان مش عليهم اقبال

اساسا ابناء الدقهليه بيجيبوا واسطات عشان يهربوا منهم

لحد كده تمام

بعد كده نتكلم عن بلقاس والسنبلاوين

بلقاس تبعد عن المنصوره نص ساعه بس وهي اختيار كويس لمن لم يستطع ان يلحق

بالمنصوره وطلخا وميت غمر واجا

مدير الاداره بتاعها راجل كويس ومرن وممكن تتكلم وتاخد وتدي معاه

انا كان تكليفي هناك وزميلنا من القاهره كان بيجي يومين بس في الاسبوع

هي تابع ليها قري كتير واللي يروح هناك يقولي وانا اقوله بالتفصيل عن افضل القري هناك

بالنسبه للسنبلاوين

فأسمع ان مدير ادارتها متشدد لدرجه ان واحد زميلي كان معايا في بلقاس حول هناك

ولكن من رخامه الوضع هناك رجعلنا تاني ههههههه اه والله

لان تابع ليها وحداااااااااااات كتتيرررررررررره






محافظة الغربية

أكلمكم عن إدارة (طنطا ثان) علشان انا تكليفي كان فيها

بالنسبه لمديرة الااداره د . ناديه العيسوى فهي حتة سكره وكانت بتتعامل معانا كوالده وليست رئيسه عمل عمري ما سمعت انها أذت حد علي الرغم من انها ناجحه جدا في مركزها تعامل الجميع بإحترام والجميع يحترمها وقبل ذلك يحبها مكتبها مفتوح دون وجود ساعى عليه و رقم موبايلها وتليفون مكتبها المباشر مع الكل وصدرها واسع لسماع الجميع

بالنسبه لوكيل الاداره د . علي ذكريا فده راجل يتحط علي الجرح يطيب زي ما يبقولوا وإنسان محترم جدا

والدكتور السعيد مزروع ذو الشخصيه القويه الحازمه صاحب البنيه القويه عندما تراه أول مره تهابه ولكنه يحظي بإحترام الجميع لانه لا يظلم احد

كانوا لما يجي لنا حد منهم تفتيش الوحده كنا بنحس ان حد من قرايبنا جاي يزورنا وكانت الممرضات تتسابق في تقديم واجب الضيافه حبا وليس نفاقا او خوفا

ولكن دوام الحال من المحال ولا احد يضمن استمرارهم في مناصبهم لأن السيئ هو الذي يبقي والجيد بيضيعوه في البلد دي

بصراحه عمر ما حد غلس علينا من الادارة والحالات القليله التي كانت تأخذ جزاءات من الاداره كانت تستحقها بإعترافهم نفسهم

كانو اما يعرفوا ان فيه تفتيش من خارج الاداره يتصلو بينا يبلغونا
اى نعم احنا لما تكون مستعدين وكويسين ده حلو في وش الاداره بس برضو ده فيه فايده لينا إن ماحدش مننا يأخذ جزا

اما من خارج الاداره فوقاكم الله شرهم كل التغليس كان بيجي منهم ( مديريه _ مجلس محلي _ محافظه _ وزاره )

السلام عليكم ورحمة الله وبركاته
بالنسبه للغربيه انا مسمعتش عن اى شكوى غير من مركزين
بسيون وقطور
طبعا افضل المراكز على ما سمعت هو طنطا تانى
ثم طنطا اول
بالنسبه لمركز قطور ودا انا تكليفى فيه فهو واخد سمعه كبيره شوبه لكنه مش سئ للدرجه
مشكلته الوحيده المرور الكتير وان مدير الاداره من محبى الواسطه والمحسوبيه
يعنى لو معاك واسطه هتبقى ملك ولا جزا ولا غيره حتى لو مرور هيغطيك بنفسه
كذلك فى التوزيع لو معاك واسطه هيوديك احسن مستشفى تكامل حتى لو فيها 10 أطباء
ولو ممعاكش يبقى وحده صحيه حتى لو هتشيلها لوحدك 7 ايام
بس هو كشخص طيب وبالالحاح عليه بيبقى كويس
وبالخبره ممكن تمشى امورك وتتعرف على المفتشين الماليين والاداريين وتاخد وضعك
كذلك ادارة السنطه وزفتى زمايلى كتير شكروا فيها
بل ان ليا زمايل فى ادارة زفتى كانوا بيقولوا ان المرور بيبلغهم قبل ما يروح

الخلاصه ان الغربيه نسبيا من المحافظات الكويسه فى التكليف
أفضل الادارات طنطا تانى ثم أول ثم زفتى ثم المحله أول وتانى ثم السنطه ثم كفر الزيات ثم سمنود ثم قطور ثم بسيون







محافظة دمياط

محافظة دمياط تنقسم الى 4 ادارات:-
-ادارة دمياط
-ادارة كفر سعد
-ادارة فارسكور
-ادارة الزرقا
بالنسبة للبعد عن القاهرة حوالي 4 ساعات او اكتر على حسب الادارة
بالنسبة للتفتيش ارخم محافظة في التفتيش وادارة دمياط اكترهم يعني في اي وقت ييجي تفتيش الساعة 12 الصبح او 12 بالليل في اي وقت واسهل حاجة عندهم الجزاءات
وكمان الفلوس مش منتظمة خالص
نصيحتي من الاخر ابعد عن دمياط باداراتها باي شكل خصوصا للي من القاهرة علشان المسافة
السلام عليكم ورحمة الله
انا جتلي ادارة فارسكور بدمياط
ورحت سالت هناك وقابلت مدير الادارة الدكتور محمد عوض
وبصراحة كان في شوية ايجابيات بس كمان في سلبيات
الايجابيات :
- فارسكور فيها 26 وحدة صحية و5 طب اسرة و2 طب اسرة لسة جديدة
-الاطباء اللي اتوزعو فارسكور 175
110 دكتورةو 65 دكتور
- على كلامه ان السكن هناك متوفر حسب حالة الطبيب
- في سكن للمتزوجين وسكن للعزاب المغتربين
- مرتب الطبيب الاول في حدود 1000 جنيه شاملة كل البدلات والحوافز
السلبيات:
- على الرغم من العدد الهائل للدكاترة الا ان مدير الادارة قاللي بالنص الحضور يوميا من السبت للخميس ولو كنت مغترب يسمحلك تمشي بعد دوام الاربعاء بس تكون في الوحدة يوم السبت الساعة 8 الصبح
- قابلت الدكتور وقعدت معاه حوالي ساعة الا ربع عمل فيهم حوالي 3 او اربع تفتيشات بالتليفون او يبعت جد من عنده
-هو بيقول اناه بيدي اخلاء لاي يحد جتله نيابة او جيش او شركة بس تجيب له الطلب
للاسف الطريق خد مني 3 ساعات ونص بالعربية من القاهرة
عديت على المديرة في دمياط
قابلتني ست طيبة جدا في شؤون العاملين اول ماعرفت ان انا من الاطباء الجدد اول حاجة قالتها " انتو صعبانين علينا التوزيع السنة ده ظالم "
بس بصراحة كمان قالت ان احنا هنحب المكان هناك
على فكرة كل الاطباء اللي اتوزعو في محافظة دمياط نفسها ليهم تدريب 7 اسابيع في المديرية في الوقت ده احنا بنتوزع عشوائي كل واحد في ادارته ومنها للوحده و التوزيع النهائي بالنسبة لفارسكور بيكون 1 \ 6
الاولويه للطبيب الاول انه يكون ولد معافى من التجنيد او طبيبة او طبيب جيشه نص تاني
اتمنى تكون المعلومات مفيدة










محافظة القليوبية

انا كان تكليفي هناك مدير ادارة الرعاية الاساسية الدكتور علاء المسلاوي راجل محترم جدا جدا
المحافظة تبعد عن القاهرة حوالي ساعة الا تلت لكن في ادارات تبعد عن القاهرة عشر دقايق زي ادارة شبر الخيمة
المحافظة فاشلة اداريا ومريحة للتكليف جدا
بالذات ادارة القناطر الخيرية مدير الادراة راجل د.عاطف محترم جدا وتعتبر من اقرب الادارات للقاهرة والتفتيش مش كتير ولو رحت طبيب تاني في وحدة بتروح 3 ايام بس بالاتفاق مع الطبيب الاول
وبالنسبة للسكن معظم الوحدات فيها سكن
والتفتيش مش كتير
والتقييم مش بيخسفوا بيك الارض زي ادارات تانية غالبا لهم مستوي معين مش بيقللوا الوحدة عنه
والفلوس مش بتتاخر ولو اتاخرت بتتاخر لمدة شهر واحد
وعامة التكليف بقى فيه فلوس كويسة وده من غير ماتشغل الوحدة برايفت لكن لو شغلت الوحدة برايفت يبقى سنة واحدة وهتجيب بي ام دبليو الفئة الخامسة
طبعا مش للدرجة دي لكن هيبقى فيها فلوس كتيرة قوي
وانا تحت امركم لو في استفسارات عن مديرية القليوبية خاصة ادارة القناطر








بالنسبة لادارة بورسعيد

فالتوزيع بيبقى في المدينة نفسها او بورفؤاد مركز طبي المدينة كويس ..

فلوسها شبه منتظمة ..

التوزيع بكوسة من الحجم العائلي..

بيبقى فيه صعوبة لما بتيجي تخلي مفيش تفتيش تقريبا (على حسب كلام صديق لي)

تبعد عن القاهرة حوالي ساعة ونص ومن مميزاتها ان مش فيه تطويح لان الوحدات مش كتير

ومواصلاتها محترمة
بورسعيد من المديريات المريحة نسبيا خاصة بالنسبة للبنات كلهم بياخدوا تكليفهم فى المدينة بص لازم تعرفوا ان انكم ممكن تتوزعوا خارج بورسعيد زى بحر البقر والكاب اتجاه الاسماعيلية او المناصرة والجرابعة والديبة اتجاه دمياط والاماكن دى اى كلام للى عاوز يعيش فى مدينة عبارة عن تجمعات صيادين ,
بالنسبة للبرايفت مفيش داخل المدينة بس بحر البقر او المناصرة اللى عليها ضرب مااعتقدش ان الدكاترة اللى فيها هايخلوكم تشتغلوا معاهم فالللى مفيش معاه واسطة اعتقد انه هايروح اماكن تعبانة ومدير الرعاية الاساسية اسمه دكتور زكريا لو قولتله يمين هايوديك شمال بورسعيد المدينة مكانمريح للى عاوز يكبر بس مفيش فلوس ولا تعليم








محافظة القاهره
القاهره فيها حاجتين مهمين

اولا الانضباط في الشغل يعني تقريبا كل يوم هتنزل الشغل

التفتيش كتير جدا الصبح وفي النبطشيات حتى في السهر كمان

بالنسبه للفلوس فعادة مش بتتاخر بس التقييم 100% بس مش 250 زى باقي المحافظات

القاهره عموما كلها مراكز مش وحدات والعدد بيكون كويس وفي دكاتره كتير اكبر مننا

نكلم بقى عن الادارات

اولا في ادارات صعب قوي تتكلف فيها الا لو ليك واسطة جامدة او مجموعك عالي جدا

ودي زي مصر الجديدة - مدينة نصر - النزهه

باقي الادارات مش بتختلف كتير

لذا من راي ترتبوهم حسب الموصلات مش شرط الاقرب جغرافيا

لان ممكن تكون قريبه بس مواصلاتها مش حلوة وتركب اكتر من حاجة

تكليفي كان في مدينة السلام تعتبر بعييدة بس مواصلاتها كويسه

لكل سكان مدينه نصر والنزهه وشيراتون

المراكز هناك كويسة جدا جديدة ونظيفه

بس المترددين عليها صعبين نوعا ما يعني يتخانقو علي اي حاجه

ادارات عين شمس والمطريه كويسين والزيتون بيشكره فيها اوي

الزاويه والوايلي نص ونص

منشية ناصر والمقطم اللي اعرفه ان فيهم مراكز في اماكن صعبه والناس مش كويسين فيها



ان التكليف فى مدينه القاهره بيتبنى سياسه الدورات
ثلاثه شهور تنظيم اسره
ومثلهم اسعاف
ومثلهم رعايه اوليه (اطفال وباطنى)
ومثلهم مش فاكر ايه
يعنى تسع شهور فى المركز بتاعك وثلاثه فى الاسعاف اللى كان على ايامنا فى مركز الاسعاف فى 26يوليوا او ااى مركز اسعاف تانى





مطروح


بالنسبه لادارات مطروح فهي كالتالي من الاقرب الي الاسكندريه الي الابعد
1-الحمام66كم من الاسكندريه حوالي 30 دقيقه علي الطريق الساحلي
2-العلمين 106 من الاسكندريه حوالي ساعه وربع
3-الضبعه157كم من الاسكندريه حوالي ساعتين الا ربع
4-راس الحكمه ساعتين ونصف الي 3 ساعات
4-مرسي مطروح(العاصمه)280كم حوالي 3 ساعات الي 3 ونصف
5-سيدي براني حوالي 4 وربع
6- السلوم حوالي 5ساعات وربع
7-سيوه حوالي 7 ساعات
تصل الحوافز في بعض الوحدات الي 600%+البدلات الاخري
إدارة الحمام

بتقول عليها كويسه جدا مستشفى

شغلها 3 أيام والباقى راحة

والسكن كويس وكانت مرتاحة جدا فيها

والفلوس كانت بتاخدها بانتظام

لكن مشكلتها الوحيدة الاخلاء

الاخلاء هناك صعبة جدا







منقوووووووووووووووووووول