للسنة الثانية على التوالى بفشل ساحق و مريع ((الدليل الممتاز لاطباء الامتياز هتدخل برجليك لغاية ماتجيب جاز ))

للسنة الثانية على التوالى بفشل ساحق و مريع ((الدليل الممتاز لاطباء الامتياز هتدخل برجليك لغاية ماتجيب جاز ))

السلام عليكم و رحمة الله و بركاته
ازيكم يا شباب الاطباء و يا دكاترة المستقبل
طبعا كلنا داخلين على سنة الامتياز و كل واحد فينا له فيها اهدافه و طموحاته
فى الاول لما كنا بنبعد عن اهلنا و اصحابنا و بنعتزل الحياة عشان المذاكرة(طبعا دة للناس اللى مش كويسة اللى كانت بتذاكر) كنا بنتحجج يعنى بالمذاكرة او المحاضرات و الرواندات او الدروس و دلوقتى بعد ماخلصنا الكلية خالص وجدت انا شخصيا العكس بقيت حاسس انى مشغول اكثر من الاول و اعتقد ان كثير منكم كدة
و انا شايف ان دة طبيعى جدا فى الكلية كنت عايش سلطان زمانى مش مطلوب منى غير المذاكرة و بس
لكن بعد ماخلصت المذاكرة و بس لقيت نفسى احمل لقب تقيل جدا و مش سهل خالص لقب ممكن يكون سبب فى دخولى الجنة و ممكن يودينى فى داهية لقب تعبت جدا عشان اوصل له و ضحيت بحاجات كثيرة و اهلى برضة تعبوا فيه كثير لقب هتكشف بيها عوارات الناس و هتبقى حياتهم فى ايديك و على رأى دكتور حسام موافى ممكن تبقى قاتل محترف تقتل و ماتتحبيش مش هاتكلم على المذاكرة من اول الثانوية العامة و سهر الليالى مرورا باللحظات الصعبة التى عشتها فى اول سنين الدراسة و كنا مش فاهمين اى حاججة (قال يعنى دلوقتى فهمنا حاجة ) ولا هاتكلم على زمايلك او زميلاتك اللى فى نفس اعمارنا و كانوا زملائنا فى الثانوية و دلوقتى اتجوزوا و ربنا رزقهم بالذرية و احنا لسة بنفكر هنعمل ايه ولا هاتكلم على ال 238 جنيه اللى هناخدهم كمرتب مايرضاش بيه اقل عامل نظافة
ولا هاتكلم على المستقبل المشرق المضئ الحلو اللى هتشوفوه بعد سنة الامتياز
و مع ذلك
اللقب الناس بتبص له بصة مش كويسة ايوة مالك مندهش ولا مذهولة كدة
الناس بتبص للدكتور دة على انه انسان شايف نفسه شوية او (مناخيره فى السما) و اعتقد لا ماعتقدش اجزم بان كل مننا مر بهذه المواقف او سمع هذه الكلمات (فى ايه يا عم هو عشان بقيت دكتور ماتعرفناش خلاص - رغم انك لسة مسلم عليه امبارح) و اخر يقول(لما تبقى دكتور كبير بس متنسناش - مش عارف انساه ليه و ازاى يعنى هانسى اسمه مثلا و لا شكله) و ثالث اول مايشوفك خاصة لو كانت اول لقاء بينكم اتقابلتوا فى فرح ولا حاجة لازم يعمل فيك موقف و لا يكلمك بقرف ولا يبصلك من فوق لتحت كنوع من(prophylactic attack) اما الاخرون فبمجرد انك تركب الميكروباظ و يعرفوا انك دكتور حتى لو كنت لسة فى سنة اولى او فى بعض الاحيان لو لسة نتيجة التنسيق طالعة مايصدق يمسكك و يكلمك على جشع الاطباء و افترائهم و جبروتهم و باقى الركاب مش هيقعدوا ساكتين بالعكس كل واحد عنده كلمة تعباه جت الفرصة انه يطلع عقد النقص و السكيزوفرنيا علينا يكلمك بكل شماتة عن اخطاء الاطباء و ان فى مصر ماعندناش دكاترة و الى اخره
كله كوم و اللى قال خمسة عين نفسى اطبق فى زمارة رقابته قال ايه يا اخويا الطبيب بيتخرج على خمسة عين اللى هما ايه يا سيدنا - عروسة و عربية و عيادة و عمار و عزبة - ماشى يا بشر

ايه اللى انا باقوله دة و ايه علاقته باللى انا جاى اتكلم فيه - ما علينا -
على العموم انا هاتكلم على نفسى و احب اعرف ارائكم معايا كزملاء فى الكفاح
انا دلوقتى اتخرجت من الكلية اينعم لكن امامى الكثير و الكثير من علامات الاستفهام هاسردها امامكم و على كل سؤال فيهم اعلق تعليق
1-سنة الامتياز اخدها برة و لا جوة ؟
قبل ما اقول اى كلمة عايز اقولك انسى اى حد بيقولك ان جوة القصر مفيش تعليم القصر يعتبر احسن مكان تتعلم فيه معظم التخصصات بس هتتعب خاصة لو اى واحد فيكم بيحب تخصص معين و ناوى عليه لو لبد فى التخصص دة و ظبط نفسه فيه هيبقى خلال كام شهر زيه زى النايب بالظبط هاقولها للمرة الثانية القصر احسن مكان تتعلم فيه بس زى ما قلت لازم تكون فايتر تستحمل الشغل الكثير و بعد كدة يكون فيك حيل انك تروح تتعلم فى المكان اللى انت عايزه
نرجع للسؤال جوة ولا برة
هنا ينقسم الناس لرأيين رأيى يقولك انا هاكمل فى القصر عشان اتعلم كويس و بالمرة اكون وسط زمايلى و كمان انا معنديش سكن برة القاهرة عشان اقدر اخرج امتيازى برة
و فريق اخر رأيهم انك تخرج امتيازك برة و دول نفسهم فيهم فريقين فى ناس بتخرج امتيازهم برة عشان يروح مستشفى كفر ابوطشط الدولى و فيها هياخد شفت واحد فى الاسبوع و باقى الاسبوع يقضيه برايفيت
الفريق الثانى فى المجموعة الثانية اقصد المجموعة اللى طلعت امتيازها برة القصر العينى يقولك انا هاخد برضة شفت واحد فى كفر اوطشط و يقية الايام انزل القصر العينى كمتطوع و اتعلم براحتى من غير ماشيل شغل ديرتى مع ان الحقيقة ان الشغل ايا كان عمره ما يتقال عليه ديرتى حتى لو كان نقل معامل و انابيب تحاليل و دم و حجز اشاعات و امضاء فحوصات - نصيبنا -
2- التخصص بتاعى اختاره على انهو اساس :
-مجموعة تقولك اختاره على حسب اللى انت بتحبه او ميال ليه لانك مدام عايزه هتنجح فيه !!
-مجموعة تانية تقولك احسن لك مدام انت مالكش نيابة فى الجامعة او ترتيبك متاخر شوية متاخدش حاجة فيها مشرط عشان دى عايزة تعليم كويس و مدام انت برة الجامعة مش هتلاقى اللى يعلمك
-مجموعة ثالثة تقولك خد الحاجات اللى شغالة فى السوق يعنى نسا و توليد و اطفال
-مجموعة رابعة و اللى هو انا مش عارف اختار ايه انا شخصيا باحس انى ممكن انجح فى اى مجال من دول و الباطنة باحبها و باحس ان فيها تفكير و دماغ عالية و بتكون فاهم فعلا كل حاجة من الالف الى الياء و صدق فعلا اللى سماها (medicine) لكن اللى بيخنقنى فيها ان مفيهاش (intervention)مفيهاش اكشن كله ويت اند سى
3- بفرض انك خلاص اخترت التخصص اللى انت عايزه و كمان اخترت المستشفى اللى هتاخد فيها امتيازك تمام هناك رأيين برضة فىا لموضوع دة
واحد يقولك التخصص اللى انت اختارته عيش امتيازك فيه يعنى مثلا لو هتاخد اطفال قضى ال 12 شهر فى ابو الريش عشان تشرب الاطفال و دة رأيى يحترم
الثانى يقولك لااااااااااااا انت اخترت تخصص يبقى استغل السنة دى انك تفوت على كل التخصصات و تتعلم من كل تخصص مبادئه و كدة يعنى عشان انت لما هاتتخصص مش هتتاح الفرصة ليك انك تشوف المسائل دى تانى
و خير الامور الوسط اتعلم الحاجة اللى انت عايزها بس خد فكرة عن الباقى
4- جوة الامتياز نفسه هتعمل ايه ؟
-هل هاكرس حياتى للمذاكرة و اعيش و اموت شهيد العلم و الطب و اهتم انى اشوف حالات كثير و الله دة شئ رائع
-و لا عايز تشتغل برايفيت عشان تزود دخلك شوية ماهو مش معقولة بابا هيقعد يصرف عليك لغاية ماشيبت و طلعلك كرش و شعر راسك و قع
ماشى هاشتغل !! لا مش ماشى اقعد قولى هتشتغل ايه
-فى دكاترة بيقضوها مستوصفات قبل بس ماتتخض هاقولك ان شغل المستوصفات او ان صح شغل السوق سهل جدا و مفيش قلق منه مانت هتعلاج ايه يعنى غير قئ و اسهال و شوية برد على غرزتين فى اللذيذ على شوية مغص على شوية دلع من الستات و الناس الكبار فى السن و دى على ما اعتقد بيخليك تبقى طبيب مقيم يعنى سمعت ان ال 24 ساعة بتاخد فيها 60 جنيه تقريبا تمام و دة اقل سعر ممكن تاخده (فيكسد ) و ممكن الفيكسد يوصل ل 100 جنيه يعنى فى مستوصفات بتديك فيكسد يقولك انت ليك مثلا 80 جنيه فى ال 24 ساعة و بس و فى مابيديش فيكسد و بيدى ريت من الاول يقولك اللى هيجى الشغل النص بالنص لو المستوصف عمل 150 جنيه فى اليوم تاخد 75 و معظم المستوصفات بتعمل الاتنين ازاى بقى يعنى يقولك الفيكسد 80 جنيه لو عديت الدبل فيكسد يعنى لو المستوصف عمل اكثر من 160 هتاخد نصف الريت و كمان شغل الجراحات بيكون مربح اكثر اقصد الغرز و فتح الخراج و كدة و فى ميزة كويسة ان فى معظم المستوصفات او فى كل المستوصفات بيكون عندك وقت زى البحر ممكن تذاكر فيه ممكن تتثقف فيه ممكن تقرأ قران فيه ممكن تحضر مثلا الزمالة او المعادلة
فى برضة ناس بتشتغل فى مستشفيات خاصة طبعا مااقصدش دار الفؤاد اكيد اقصد مستشفى كانت مستوصف وربنا كرمهم و حجزوا الدور اللى فوق و بيعملوا عمليات و و توليد و كدة دى بتبقى مربحة اكثر من المستوصف ليه غير انك موجود كممارس عام طوال ال 24 ساعة بتاخد فلوس مقابل متابعة حالات العمليات و احيانا بتخش تساعد فى ولادة او فى عملية بيطلع لك منها مبلغ كويس و ممكن تعمل على الاقل ضعف المرتب اللى هتاخده فى المستوصف
وطالما بنتكلم على الكلينيكال يبقى لازم نقول ان فى شغل حضانات الاطفال و متابعة الاطفال حديثى الولادة دى مربحة جدا و ممكن فى الاماكن المحترمة تاخد 200 جنيه فى ال 24 ساعة و اقل حاجة 100 جنيه كويس اوى طبعا بس لازم تروح مكان هيوافقوا انك تتعلم الاول شوية او انت تكون بتنزل فى الحضانات او فى المبتسرين عندنا فى القصر و تتعلم ازاى تتعامل مع التنفس الصناعى و ازاى تركب تيوبة و كدة
هات اللى بعده
- فى مجموعة تانية تقولك انا هاقف فى صيدلية عشان اتعلم اسماء الادوية كلها طب و انت هتعمل ايه يا عم الداكتور باسماء الادوية كلها انت هتحتاج الادوية اللى فى تخصصك بس و مجرد اسماء الادوية الشهيرة بس عشان لو اتسألت مايبقاش منظرك وحش و عشان لما حد بيقولك الدكتور كتب لى الدوا دة تعرف على الاقل هو بتاع ايه و الصيدليات مرتبها بيكون بالساعة الشهرية يعنى ايه ساعة شهرية يعنى المفروض انك كل يوم بتسجل حضور و انصراف مثلا متفق على 8 ساعاات فى اليوم يعنى هتشتغل 25 يوم يبقى هتعمل 200 ساعة فى الشهر
بتضرب 200 فى ثمن الساعة اللى انت متفق عليها و تقسم على 26 حاجة زى كدة يعنى
الساعة بتفرق على حسب مكان الصيدلية بولاق غير المهندسين و بتفرق على حسب الصيدلية شغالة ولا لا
فى صيدلية بتعمل 500 جنيه فى اليوم و فى صيدلية بتعمل 10 الاف و طالع على العموم الساعة بتتراوح من حوالى 80 جنيه لغاية 150 جنيه بس الارقام العالية دى بتبقى غالبا فى الصيدليات الكبيرة اوى و كمان للصيادلة عشان لو فى تفتيش او حاجة المفتش بيكون عايز صيدلى تقدر تقول الرينج تقريبا 100 جنيه او 110 فى الساعة بتضرب ال 100 جنيه فى عدد الساعات اللى انت اشتغلتها و بتقسم على 26
فى ميزة كويسة فى الصيدلية انك لو فى مكان شعبى ممكن تشتغل زى المستوصف يعنى العيان يجيلك يقوك عندى برد توصف له كذا و ممكن كمان تدخله و تسمع صدره و احد تانى عنده مغص كلوى ممكن تعلق له محلول فى الصيدلية يعنى ممكن تعمل شغل جامد عشان نفسك و عشان الصيدلية
-مجموعة اخرى بتتجه للعمل فى المعامل و مراكز الاشعة و دى مرتبها بيكون معقول نوعا ما الشغل فيها بيكون عبارة عن call center
يعنى واحد يتصل يقولك التحليل دة سعره كام قدامك الكومبيوتر و قدامك الداتا كلها واحد تانى يقولك التحليل دة هل ليه تحضيرات معينة يعنى تقدر تقول خدمة عملاء ميزتها ان مفيش عليك اى مسئوليية بعكس المستوصف ميزتها انك قاعد فى تكييف و كرسى مريح و ميزتها ان مرتبها كويس يعنى الساعة ب 5.40 قرش الكلام دة فى معمل الفا و الحسابة بتحسب و الشفت بيكون 7 ساعات و ممكن تاخد شفتات على قد ماتقدر
-مجموعة اخرى بتشتغل كميديكال ريب و دى طبعا تكاد تكون من افضل الوظائف فى المرتب خاصة لو كنت شطور و بتعرف تقنع الزبون بس باحس انها شغلانة مهينة نوعا ما يعنى ايه اقعد الف بادوية ولا بتاع و حد يقولى شكرا هو انا جاى اشحت منك يا ابن الحلال مع احترامى للدكاترة و الصيادلة و الاخوة الاعزاء اللى بيشتغلوها بس انا مارضاش ان دكتور زي زيه او هابقى زيه بعد كام سنة يكلمنى بطريقة مش كويسة و اقعد اجيب له فى هدايا عشان يكتب الدواء دة انا شخصيا ماحبتش الوظيفة دى بالذات و اشتغلت فى ال 3 وظائف المذكورة اعلاه
- فى بعض الحاجات بقى المربحة جدا بس للاسف مش هتنفع للى واخد امتيازه جوة القصر عايزة حد واخد امتيازه برة القصر عشان يضرب الغياب براحته و يروح يشتغل فى شركات البترول او فى فنادق شرم الشيخ و القرى السياحية فى الغردقة و كدة بالنسبة للبترول بتشتغل اسبوعين و تريح اسبوعين وتاخد 2500 جنيه و بتشتغل فى الصحراء او فى اى موقع بترول برضة ممارس عام يعنى بس بمرتب محترم عيبها انهم ممكن يقعدوك اكثر من اسبوعين لغاية لما اللى بعدك يجى يستلم
الشغل فى الفنادق ممكن توصل ل 3 و 4 الاف جنيه بس بيكون نظام الشغل 3 اسابيع شغل و اسبوع واحد راحة و دى بتكون عايزة واسطة او مش واسطة يعنى اللى بيكون شغال هناك بيجيب الناس اللى عارفها و كدة و طبعا المبلغ مش كبير على صاحب الفندق لانه بياخد من السائح فى الكشف الواحد يوروهات لا تعد ولا تحصى

-على فكرة فى مجموعة اخيرة مقضياها انتخة و صياعة كفاية اللى شفناه فى ال6 سنين خلينا نهيس شوية ماهى سنة مفيش اى التزامات عليك و لا مذاكرة و لا شغل ولا ست مستنياك فى البيت عشان تصدعك
5- بعض مننا له نظرة مبعدية بيقولك طيب يا دكتور هو احنا بعد الامتياز المفروض هنبقى دكاترة هنعمل ايه عشان نبقى نتحول من ميزو لدكتور محترم يعنى زى الدكاترة اللى عندهم عيادات اول واحدة من الخمس عيون
-اللى له نيابة فى الجامعة دة هيلاقى مكان كويس يتعلم فيه و يحضر فيه الماستر و الدكتوراة
- فى ناس بتفكر فى الزمالات او المعادلات و دى ميزتها انها هتديك شهادة محترمة و هتعملك خلال 3 سنين او 4 اخصائى محترم و ممكن تسافر برة دة فى حالة المعادلة البريطانية لكن مشكلتها انها غالية يعنى البريطانية مثلا محتاجة 22 الف جنيه على 3 مراحل
-ناس تقولك اعمل نائب زائر يعنى المكان اللى هتروح فيه فى التكليف او وزارة الصحة ممكن يوافق انك تاخد اجازة و تعمل نائب فى القصر العينى و هتتعلم زيك زى النائب الاساسى ولو المكان اللى انت فيه ماوافقش هتضرط للاستقالة نهائيا من وزارة الصحة و دة قرار خطير و لازم تكون مستريح ماديا و انت بتتاخده عشان كدة اصبحت رسميا فى الشارع , و المشكلة ان عشان القصر ياخدك كنائب و تتعلم عنده لازم تدفع فى الشهر 200 جنيه , و حتى بعد ما بتدفع لو انت نائب زائر فى حاجة فيها مشرط صعب اوى تتعلم لان النائب الجونيور هو اللى بيشتغل ماهو واحد بس اللى هيمسك المشرط و يشتغل وهو شايف انه احق منك بكدة عشان هو الاساسى و انت الزائر و مع ذلك فى بعض الناس بتقول ان لو النايب الزائر شاطر و بتاع شغل بيتعلم و بيفرض نفسه على الجميع و بيبدأ ياخد ثقة الاستاف و كدة و انك ممكن فى الجراحات و العظام و الحاجات دى تتعلم و برضة فى النسا رغم انها تبع الجراحات بس الزاير بيشتغل لان الشغل اصلا كثير جدا و مش لاقى اللى يشيله المقصود ان فى الباطنة و الاطفال النائب الزائر ممكن اوى يكون اشطر من النائب الاساسى عشان العيان موجود و الكل بيشتغل عليه الكل ممكن يسمع قلبه و يحس الكبد و يشخص و يتابع الحالة لكن الجراحة هو واحد بس اللى بيخش و هو اللى بيشتغل و كمان مفيش مانع من بعض النفسنة يعنى الاساسى عايز يحسسك برضة انه اساسى و انت جاى ضيف يعنى تقعد بأدبك
-ناس تقولك زمالة مصرية يمكن !!
-ناس تقولك روح على وزارة الصحة و اشتغل هناك و اعمل الماستر هناك ربنا يدينا و يدكوا طولة العمر
6- بالنسبة للشباب ليهم جيش يعنى مش حرام اقعد 7 سنين فى الكلية بعد كدة كمان 3 سنين جيش ياظلمة
و المشكلة ان نسبة هائلة من الدفعة بتلبس على طول (سورى هنا الكلمة مش بلفظها الدارج بتلبس يعنى بتلبس الزى العسكرى او مابتاخدش تاجيل او اعفاء بتدخل على الجيش على طول)
زى ماقلت فى اول الموضوع من ساعة ماخلصت الثانوية كدة 10 سنين و انت لسة واقف عن نقطة البداية و سلم لى على الخمس عيون
7- سؤال انا عارف انكم عمالين بتدوروا عليه من اول الموضوع هو فين الجواز فى الزيطة دى كلها - هاقولك العيب مش عليك العيب على الخمس العيون ابقى قابلنى بقى
طبعا الناس اللى اهلهم ساعدوهم متجوزين دلوقتى و معاهم عيالهم
لكن بالنسبة للطبيب لو اهلك مش هيساعدوك مساعدة حقيقية من الالف الى الياء يبقى هتتاخر شويتين ثلاثة فى الموضوع المؤلم دة مش اقل من 5 سنين بعد الامتياز دة لو هتعتمد على نفسك لو اهلك مثلا هيساعدوك نص نص ممكن يبقوا سنتين لو ليك جيش يبقى معاك رربنا مدهما كمان سنتين
حتى بالنسبة لاخواتنا الدكتورات هل لو اتقدملها واحد اقل منها فى العلم او العقل ممكن ترضى بيه و هل هتتجوز وهى فى الامتياز ولا هتقولوا الامتياز دة تعب و الجواز عايز تفرغ هل هتأجلوه لبعد الامتياز و لا بعد الماجيستير ولا مش فارقة انا شخصيا ماعرفش اترك الاجابة لاخواتنا الطبيبات

بعض المعلومات البسيطة جدا و التعريفات وا لنصائح بخصوص الامتياز :
بالترتيب شهرين اطفال شهرين نسا شهر اسبيشيال جراحة و شهر اسبيشيال باطنة و شهرين طوارئ و شهرين جراحة منين ما بدأت السلسلة هتكمل الطريق
- اكثر الاقسام تعبا هى الباطنة و اقلهم الاطفال
-اكثر مكان هتتعلم فيه هو الطوارئ و اعتقد انهم هيبقى احسن شهرين عندك
و الجراحة طول عمرها راحة
و الاسبيشيالات لو بعدت عن العضم و عن جراحة القلب و الصدر و جراحة المخ و الاعصاب يبقى هتستريح جامد
-الشفتات هى جمع المذاكر السالم لشفت يعنى لازم المستشفى يكون فيها امتياز طوال ال 24 ساعة يعنى اول شفت اسمه المورنينج دة من 8صباحا ل 3 ظهرا الشفت الثانى اللى هو الميد دة من 3ظهرا الى عشرة مساءا
اخر شفت اللى هو النايت من 10مساءا ل 8 الصبح
- الامضاء : المصطلح دة بيطلق على المكان اللى هتمضى فيه انك وصلت بسلامة الله و قبل ماتمشى متنساش برضة تمضى معروف مكانه فى كل قسم و بيرخموا اوى الصبح بالذات بعد الضهر و بالليل مش اوى
اماكنها فين الاطفال بتكون باليد عند مدام احسان الصبح و بعد الضهر فى نفس المكتب و بالليل مفيش امضاء فى الاطفال و دى ميزة كبرى فى الاطفال ومدام احسان موجودة فى المكتب اللى فى الدور الارضى اللى جنب مدير المستشفى على طول اللى فى مستشفى ابوالريش اليابانى
النسا الامضاء بتكون بالكارت و بتكون فى مستشفى النسا فى اخر الدنيا و بعد الضهر فى نفس المكان و بالليل برضة مفيش امضاء و دى ميزة مهمة
مستشفى الباطنة الامضاء الصبح عند مدام فاطمة فى الدور الاول جنب غرفة الاشعة المقطعية و بعد الظهر و بالليل بتكون فى الكشك اللى جنب الاستقبال فى الدور الارضى الامضاء برضة باليد
الطوارئ الامضاء الصبح و الظهر و بالليل فى الكشك اللى على يمينك و انت داخل مستشفى الطوارئ من ناحية المنيل التخصصى كدة بتمضى برضة بايدك
ادارة بحرى الامضاء بالكارت و هى ارخم الادارات بالمناسبة فى موضوع الامضاء و الامضاء موجودة امام قسم 6 بالظبط
ادارى قبلى الامضاء باليد و هى جانب المعمل تقدر تقول قدام قسم خمسة
حاجة مهمة برضة
الامضاء الصبح بتبدأ فى كل حتة من الساعة سبعة و نص او ثمانية الا ربع
لغاية ثمانية و ربع
بتمضى تأخير لغاية الساعة ثمانية و نص او تسعة الا ربع فى الاطفال و النسا
لو اتاخرت عن كدة فى حاجة اسمها اذن تأخير
دة بيكون فى ادارة قبلى و فى النسا و الاطفال لغاية الساعة 10
و فى ادارة بحرى لغاية تسعة و ربع
فى الباطنة بعد تسعة الا ربع او تسعة بالكثير مش هتقر تعمل اذن

انت عندك فى الاسبوع من 3 ل 5 شفتات كحد اقصى

فى اليوم اللى عندك شفت هتمضى فى وقت الشفت


لو فى اى يوم من الايام انت نايت يبقى مش هتنزل الصبح خلاص هتنزل المستشفى تمضى و تشتغل من الساعة 10 بالليل و الساعة 8 الصبح تنصرف و خلاص على كدة مالكش امضاء تانى فى اليوم دة
ينى انت لونايت يوم السبت هتمضى الساعة 10 مساءا يوم السبت و يوم الاحد هتمضى 8 الصبح و تمشى مالكش امضاء تانى فى يوم الاحد

لكن لو فرضنا انك فى يوم ماعندكش شفت يبقى هتضطر تنزل فى اليوم دة تمضى حضور و انصراف

الساعة 8 الصبح و 3 عصرا ايه الفايدة انا ماعرفش و استحالة تلاقى حد يعرف

اثناء الوقت دة ممكن تروح تعمل مشاوير ممكن تقعد تذاكر فى المكتبة لو بيتك قريب ممكن تروح

طيب و الغياب نظامه ايه

انت ليك 7 ايام عارضة و 14 اعتيادى و 7 مرضى المرضى دة انساه عشان مش هتعرف تاخده و لفة طويلة

يعنى انت ليك طول السنة 21 يوم مدفوعين الاجر يعنى تغيب و تاخد المرتب عادى

لكن بعيدا عن ال 21 يوم اللى اكيد مش هيكفوا حد

انت ليك فى الشهر 6 ايام غياب سواء غياب بدون اذن او عارضة او اعتيادى اهم حاجة ماتعديش باى حال من الاحوال 6 ايام و نقول الشهر فيه 4 جمع يبقى كدة عندك عشر ايام ماتنزلش و الاعياد و العطلات الرسمية برضة مايتنزلش

فى حاجة اسمها الصورى فى بعض الروندات زى الاطفال و النسا الصورى مبهدل الدنيا خاصة فى الاطفال يعنى ايه صورى بقى

يعنى انك تكتب نفسك فى الجدول اللى عند الادارة نايت و الميزة فى الاطفال و النسا ان مفيش امضاء بالليل

يبقى انت كدة اليوم اللى هتعمل نفسك نايت مش هتنزل فيه لكن هتنزل تانى يوم تمضى انصراف و تروح بيتك او ممكن تعمل نفسك ميد صورى بحيث انك تنزل تمضى الساعة 3 العصر و مالكش امضاء انصراف و هكذا
بشكل عام شفت الميد و النايت الشغل فيهم بيكون قليل جدا جدا خاصة شيفت النايت و الثقل كله بيكون فى شفت الصبح

- بنسمع كل يوم عن الشغل الديرتى هو ايه بقى يعنى انك تروح تودى عينات الدم للمعمل من مستشفى الباطنة للقصر و بعد شوية تروح تجيب النتيجة و بعد كدة ترجع تحجز دم بعد شوية تروح تجيب الدم يعنى انك تقعد الليل و النهار فى الفيتلة يعنى الدكتور يكدرك ويقولك فيتل القسم كله يعنى بتاع 20 عيان مثلا ولا حاجة يعنى تاخد العيان و تعمله اشعة ولا اى حاجة كلام فاضى فعلا و اى عامل مابيعرفش يقرا و يكتب ممكن يعمله
- ايه هى المهارات الاساسية اللى لازم تتعلمها عشان هتحتاجها باستمرار و كدة كدة هتتعلما لانك غالبا هتعملها كل يوم كطبيب او بالاخص هتحتاجه كثير فى الامتياز
1- سحب العينات و الكانيولا 2-(ِABG)
3-غسيل المعدة 4- (cpr)
5-القسطرة خلى بالك لو فيميل و (virgin) ماتعملهاش الا لو انت متمكن هى سهلة و كل حاجة بس الغلطة بكارثة رغم انها نقطة هامشية بس حبيت اذكرها عشان تعرف انك لو مش عارف تعمل حاجة مهما كانت بسيطة بلاش تعملها احنا اه بنتعلم بس مش معنى كدة اننا نبهدل الناس و ما تتكسفش انك تستعين بصديق اى حاجة هتعملها لاول مرة لازم يكون جنبك واحد بيعرف يعملها كويس و غير كل دة عشان ضميرك و عشان موضوع ال medicolegal
الحاجات دى كلها بدائية بس ماينفعش ماتعرفش تعملها
- اخطر حاجة احب احذرك منها هى الشكشكة كثير مننا عشان مبتدئين ممكن يشك نفسه وهو بيدى العيان ولا بيسحب معامل و لا بيخيط عيان يشك نفسه و انتوا عارفين ان فيروس سى عندنا حدث و لا حرج و كذلك الايدز موجود بكميات قليلة عشان كدة خللى بالك
- بمناسبة التحذيرات برضة احبك احذرك من التمريض هما فى كثير منهم محترمين سواء فى شغلهم او طريقة تعاملهم مع الدكاترة خاصة انهم بيحسوا انك اصغر منهم او قد عيالهم فى بعض الاحيان و مع ذلك بتترسم عليهم و كمان بيحسوا انهم شغالين فى المستشفى من و انت لسة بيبى صغير فمش هتيجى تعد عليهن
و خللى بالك من نقطة انهم هيعلموك حاجات كثير بحكم الخبرة سواء فى الشغل او حتى التعامل مع العيانين
عاملهم باحترام و بود و خليهم يحترموك بس مش معنى كدة انك برضة تسيب العملية سداح مداح و هى تقولك يا ميدو و انت تقولها يا ميمى و يا توتا لا انت اسمك دكتور فلان و هى اسمها مدام فلانة او ميس فلانة على فكرة كلمة ميس دى بيحبوها اوى القصد انك لازم تحترمهم و تقدرهم لانهم فعلا يستحقوا كدة

- كفاية تحذيرات نقول نصايح النائب و الممرضة و العمال عليهم اوفر لود ارحمهم و ساعدوا بعض مش انت لوحدك اللى مخنوق
-النايب اللى هتشيله فى يوم صعب او يوم ديرتى تانى يوم هياخدك من ايديك يعلمك
-حاول تحضر فى الاستقبال و الطوارئ عشان تتعلم تتعامل مع الحالات(hot)و حاول تقف فى العيادات الخارجية عشان تعرف تتعامل مع الحالات(cold)
- فى كل قسم هتروحه تركز على حاجتين مهمين اوى انا شايف ان المفروض امتحانات كلية الطب كلها فى اى مادة تركز عليهم و يبقوا 90% من الامتحان اللى هما حاجتين اولا الحالات الشائعة ثانيا حالات الطوائ
الحالات الشائعة عشان هتقابلك كل يوم يعنى الترجيع ونزلات البرد فى الاطفال و تنظيم الاسرة للسيدات و على هذا المنوال و الطوارئ عشان انت لو مالحقتش العيان ماحدش هيلحقه المقصود ان فى كل حتة هتروحها تتعلم فيهم الطوارئ و الحاجات الشائعة
-عيانين القصر العينى معظمهم غلابة و معظمهم حالاتهم صعبة فعلا عاملهم بحب و بحنان و كلمة واحدة ممكن تخفف الام كثير و دعوة منهم هتخليك منتعش طول اليوم
- العيانين برضة ليهم كرامة و ليهم عوارات ياريت نحافظ عليه يعنى مثلا عيان فى غيبوبة و هتركب له قسطرة ماتنساش تقفل الستارة عليكوا قبل ماتعمل اى حاجة
-متنساش تاخد تطيعم الكبد الوبائى و متنساش تغسل ايدك بين كل عيان و الثانى و متنساش الجلفز
-رغم كل الصعوبات اللى ذكرتها و اللى ماذكرتهاش و رغم التعب اللى تعبناه و اللى لسة هنتعبه و رغم المشاكل بتاعة مهنتنا و المشاكل بتاعة الحياة بس انت فى الاول و فى الاخر اسمك دكتور او خلينى اقولهاك زى ماكان العبقرى الرائع دكتور حسام موافى بيقول انت (حكيم) يعنى تعرف ازاى تتعامل مع العيان و تقنعه بالعلاج و تعرف ان العيان جسد و روح لازم تعامل الاتنين و تعلاجهم و تعرف امتى تكتب العلاج الغالى و امتى ماتكتبوش حكيم بكل ما فى الكلمة من معنى انت ليدر لفريق طبى كامل او منظومة كاملة فيها ممرضة و عمال و فنيين و مستقبلا هيكون تحت ايديك دكاترة لازم تبقى حكيم مش مجرد دكتور و بس

مهنتنا يا دكاترة مفيهاش تأليف اوعى تتكسف و تفتى من غير ماتعرف اعمل على طول ريفير للى اعلم منك اتذكر حتى الان كلمة لدكتور مجدى يعقوب بيقول انا شغال عند العيان لو مفيش عيان انا مش هيبقى ليا دور فى المجتمع
-مهنتنا يا دكاترة اصعب مهنة و اهم مهنة اى واحد ممكن يغلط فى اى مهنة و يصلح غلطه او يستشير لكن انت غلطتك العيان هو اللى هيشيلها و فى احيان كثير بيبقى ماعندكش وقت تستشير و كان دكتور الشايب قال كلمة كويسة ان الغلطة اللى هتعملها فى عيان هتترد لك بس مش فيك فى واحد غالى عليك
و اخر حاجة متنساش ان مهنتنا دى اهم حاجة فيها النية و من احياها فكأنما احيا الناس جميعا


بقلم / د. مصطفى المحمدى