التقارير الطبية وحالات الوفاة بالنسبة لاطباء التكليف

انا هتكلم هنا عن تقارير الوفاه التي تكتبها عندما تكون في الوحده الصحيه بتاعتك ويجيلك استدعاء من الشرطه لوجود حادثه في القريه اللي انت فيها

اولا : استعن بالله

ثانيا : لا تظهر امام الاخرين الخوف او عدم الثقه او الارتباك خصوصا اذا كانت اول مره ليك

ثالثا : لا تتحرك من مكان عملك الا لما يجيلك استدعاء رسمي من النقطه او المركز وده غالبا بيكون صيغته كالاتي( السيد الطبيب مفتش صحة .................. نرجو من سيادتكم توقيع الكشف الطبي علي المتوفي الي رحمة مولاه ................ والموجود بـ............. وتحديد وجود شبه جنائيه من عدمه)

وموقع علي هذا الاستدعاء

رابعا : قم بتسجيل خروجك وسببه في دفتر خط سير الاطباء (ماحدش هاينفعك لما يجيلك مرور وانت بره ويلبك جزا)

خامسا : ممكن تعمل لنفسك بريستيج وتتلطب البوكس يوصلك (طبعا تركب قدام مش ورا) وهما مش هيتأخروا عن تنفيذ طلباتك

سادسا : لاتكشف علي الجثه الا في وجود عامل معك من الوحده وواحد فقط من الاقارب الرجال للمتوفي (يستحسن ان لا يكون شديد القرابه بالمتوفي)

سابعا: قم بفحص الجثه بكاملها من اصابع قدميها حتي رأسها ولاحظ اي علامات غير طبيعيه مثل الجروح بأنواعها والكدمات او وجود علامات خنق (حز علي الرقبه) او وجود حرق كل هذا طبعا بالنظر ثم افحص بيدك كل الجسم للتأكد من عدم وجود اي عظام مكسوره

سابعا : كتابة التقرير الطبي
يكتب من اصل وصوره بالكربون ويختم الاصل بختم النسر بالوحده (يستحسن تكون واخده معاك) ويسلم الاصل الي الضابط الذي يقوم بالتوقيع علي الصوره (استلمت الاصل) وتخلي الصوره الموقعه منه معاك

صيغة التقرير الطبي
قد تختلف الصيغ قليلا ولكن الصيغه التي سوف اذكرها تعلمتها من مستشار قريب لي وهي كالآتي

تقرير طبي اولي

حيث تبلغ لنا نحن طبيب/..................... اثناء تواجدنا بمقر عملنا بالوحده الصحيه بقريه ........... اليوم / / في تمام الساعه (صباح/مساء) من (مركز/نقطة) شرطة ............ بوجود حالة وفاة (بمنزلها / بجوار ترعه ....... / بقطعة ارض زراعيه ملك ............)
وعليه وبالتوجه وتوقيع الكشف الطبى الاولي تبين ان الجثه لذكر في العقد (الثاني / الخامس) من العمر<لاتحدد العمر بالضبط> يرتدي ........................ويوجد جرح قطعي بيسار الجبهة طوله حوالي ... سم ..................الخ ويرجح ان سبب الوفاه هو ............... ولا يوجد شبهة جنائيه ظاهره والجثه تحت تصرف النيابه
تحريرا في (التاريخ كتابتا) مفتش صحة .................
التوقيع

ثامنا : خلي بالك من الكلمات اللي تحتها خط بالذات عبارة شبه جنائيه ظاهره لانك غير مسئول مثلا عن تحديد الوفاه بالسم مثلا وكذلك عبارة والجثه تحت تصرف النيابه هو وكيل النيابه حر ياخد بتقريرك علي مسئوليته لعدم وجود ملابسات تدل علي وجود شبهة جنائيه او يحولها للطبيب الشرعي وماتنساش تحوط حول التقرير بالقلم من جميع النواحي لعدم اضافة شيئ اليه

تاسعا : بعد ما خلصت زي الشاطر كده خليهم يرجعوك في نفس البوكس اللي جابك مش بعد ما خدوا فايدتهم يسبوك ترجع علي رجلك

عاشرا : ارجوا من كل اللي استفاد من الكلام اللي تعبت نفسي في كتابته ده ان يدعو لي بخيري الدنيا والاخره


بالنسبه للحالات اللي ممكن تشوفها ممكن تقسمها اللي 4 اصناف

اولا : وفاه طبيعيه
مثلا شخص كبير في السن عنده فوق السبعين ودي بعد فحص الجثه والتأكد من عدم وجود كدمات مثلا (ماتطمنش انه كبير وتقول ادفنوا من غير ما تشوفه ممكن يكون ولاده او احفاده مموتينه علشان يورثوه حصلت معايا بس ربنا سترها معايا والخبر وصلني من ناس كنت مقدملهم خدمه قبل كده وقالولي قبل ما اديهم التصريح ومن ساعتها اتعلمت اني اشوف كل جثه مهما كانت)

ثانيا : وفاه طبيعيه مقلقه
واهمها وفيات الاطفال والشباب والزوجات الصغيرات نسبيا
دي بقي لازم لازم تشوف الجثه وتتأكد من سبب الوفاه
في الاطفال مثلا ممكن يكون الطفل مضروب او ممكن تكون الوفاه نتيجه نزله شعبيه او نزله معويه حاده

ثالثا : وفيات مطلوب تحديد وجود شبه جنائيه ام لا فيها
وهي مثل الحريق والغرق والصعق الكهربي

جميع الحالات السابقه لا تعطي التصريح من نفسك يجب ابلاغ الشرطه وهما يستدعوك كما سبق شرحه

1 - حالات الحريق : يحب تحديد نوع الحرق هل هو من الدرجه الاولي او الثانيه او الثالثه
ثم تحديد اماكن الحرق ثم تحديد نسبته ثم تحديد سبب الوفاه وهو في حاله الحريق بيكون احد سببين إما تقول الوفاه نتيجه التأثر بالحريق اوتقول الوفاه نتيجة الاختناق من الغازات والعوادم التانجه من الحرق ودي الاكثر شيوعا وبتقولها لو نسبه الحرق مش كبيره وحدثت الوفاه إذاً فالسبب هو الاختناق

2 - حالات الغرق : يحب استبعاد وجود كدمات بالجثه لو الجثه لسه طازه لانه ممكن يكون مقتول وبعد كده مرمي في الترعه مثلا وسبب الوفاه هنا كالاتي (اسفيكسيا الاختناق نتيجة الغرق)
ما تستغربش وتقول اكتب اسفيكسيا!!!! ايوه اكتبها كل وكلاء النيابه عارفين معناها
اما لو الجثه قديمه اخلع طبعا واكتب لا يمكن الجزم بسبب الوفاه نظرا للتحلل الجزئي للجثه

3 - حالات الصعق الكهربائي :
الصعق الكهربائي اما جاف او رطب
الجاف قد يتكرك اثر حرق مكان مدخل الكهرباء للجسم وده لازم اذا وجدته تذكره في التقرير وتذكر شكله
اما الرطب مثل المياه المكهربه فده غالبا لا يترك اثر
وغالبا حالات الصعق انت بتبقي عارف من الهيستوري قبل ما تروح

تنويه : بعض زملائي القدامي هنا ممكن يقولو لي ايه ياعم الهيصه اللي انت عمال تقولها دي الموضوع مش مستاهل
بقولهم اعملو بالمثل اللي بيقول امشي عدل يحتار عدوك فيك فعلا ممكن الامور دي تعدي بالساهل لكن ما تنسوش ان لو حدثت مشكله واحده فقط (فالغلطه فيها بفوره) زي مابيقولوا يعني نيابه وممكن تلاقي نفسك متهم بالتستر علي جريمه قتل والرشوه
ممكن ولا لأ ؟؟؟ ولوحتي كانت النسبه ضئيله فالحذر واجب.

وقبل كل ده انت بتعامل ربنا في نقطه حساسه
يعني ماذا تقول لربنا يوم الحساب اذا قالك فلان اللي انت صرحتلهم يدفنوه كان مقتول وانت ضيعت حقه لانك كسلت تشوفه
ساعتها حسابك هيبقي عامل ازاي
أسأل الله الرحمه وان يتجاوز عن خطايانا




رابعا : حالات وفاه جنائيه مؤكده : دي بقى يقولهالكو المفتش كورومبو وابقو قابلوني الحلقه الجايه






طبعا مش كل حالات الوفاه بتتبلغ من قسم الشرطه..بل العكس تماما..اغلب حالات الوفاه الطبيعيه بيبلغ بيها اقارب المتوفي..ويجب انه يكون المبلغ هو قريب من الدرجه الاولي او الثانيه..

هحكي لحضرتك تسلسل الاحداث (في الغالب) وكنت بعمل ايه..والله اعلم..

بيجي قريب المتوفي..يبلغ حضرتك ان عنده حاله وفاه ومحتاجين من حضرتك تصريح بالدفن..فأنتي بتعزيهم طبعا وبتعرفي مين بالظبط اللي هيكون المبلغ بحاله الوفاه ف الاوراق الرسميه..لان غالبا بيكون جايلك ف الوحده اكتر من شخص..تشوفي اقربهم للمتوفي وتاخدي منه بطاقته وبطاقه المتوفي..او شهاده ميلاده والبطاقه الصحيه لو كان طفل..وتسيبي البطايق دي في الوحده..وتشوفي حد من الموظفين يروح معاكي ويفضل يكون شخص ثقه ويكون مش صغير في السن ويفضل انه يكون يعرف اهل المتوفي..

بتروحي حضرتك لبيتهم وتدخلي تشوفي الحاله كويس جدا جدا جدا..ولو كان بيشكي من امراض مزمنه وبياخد علاج يبقي تشوفي الروشتات وتواريخها والاسم المكتوب عليها وتشوفي العلاج المكتوب يمشي مع المرض اللي كان بيشكي منه زي ما اهله هيقولولك ولا لا..

في اللحظه دي..رد فعلك هينقسم ل 3 احتمالات....

اول احتمال..ان الوفاه طبيعيه تماما ومش شايفه اي شبهه جنائيه من اي نوع..واخدتي قرارك انك هتمضي علي تصريح الدفن وشهاده الوفاه..وفي الاحتمال ده بيكون مفيش اي مشاكل وبترجعي الوحده تاني وبتمضي عادي..

تاني احتمال..ان الوفاه غير طبيعيه ومتأكده ان فيه شبهه جنائيه..واخدتي قرارك بينك وبين نفسك انك مستحيل تمضي علي اي حاجه..وهنا بقي لازم تتصرفي بحكمه ..اولا وانتي بتكشفي ولقيتي اثار جروح او خنق او ماشابه..متحاوليش تقفي عندها كتير واعملي نفسك انك مش واخده بالك..ومتظهريش انك لقيتي كارثه..بل بالعكس..اسألي عليها بطريقه عاديه جدا واي اجابه هيقولهالك اعملي نفسك انك مقتنعه تماما ومصدقاهم مليون في الميه..وبعد كده قوليلهم انك هتمضي علي تصريح الدفن وعايزه اللي هيخلص الورق يروح معاكي الوحده عشان دفتر الورق هناك وكمان البطايق هنااااااك..واول ما توصلي الوحده وتطمني كويس جدا ابدئي في اجراءات الابلاغ بالاشتباه..اتصلي اولا بمدير الاداره بلغيه..واحيانا ممكن تتصلي بالشرطه..

ثالث احتمال..ان الوفاه غير محدده السبب..يعني مش قادره تحكمي بالظبط..والافضل هنا انك متمضيش وتتعاملي معاها بنفس الطريقه السابقه ولكن متتصليش بالشرطه وخلي مدير الاداره يبعت حد يشوفها..


......ملحوظه مهمه..متاخديش معاكي اي ورق ولا متكتبيش تصريح الدفن في منزل المتوفي..استني لغايه لما ترجعي الوحده وتكوني مطمنه كويس واتصرفي كما يحلو لك..


بالنسبه للحالات اللي بتيجي عن طريق الشرطه او النيابه..دي بتكون حالات قليله..وحسب هدوء البلد وخلوها من المشاكل من عدمه..
وفي الحالات دي يبقي لازم تكشفي علي الحاله في مكان وقوع الحادثه..يعني لو غريق مثلا يبقي حضرتك تكشفي عليه في المكان اللي خرجوه من الميه عليه مباشره..في الشارع يعني..الا لو النيابه هيه اللي قررت ان الجثه تتحرك من مكانها..وكذلك كل الحوادث..

ممنووووع ان حضرتك تروحي تشوفي اي حاله وفاه نتيجه اي حادثه الا بأذن من النيابه..يعني لو حد من اهل البلد جه قالك فيه واحد قريبي غرق وعايزينك تكشفي عليه..متتحركيش من مكانك خالص الا لما تجيلك اشاره من الشرطه..

مش عارف بقي قدرت اقول حاجات مفيده ولا لا..بس انا مش هقول اكتر من اللي هيقوله بقيه الدكاتره ولو فيه اي خطأ في كلامي ياريت حد يصححه..

للاسف انا كل اللي كتبته ده نتيجه تجربه شخصيه مريره مع مايقرب من 500 حاله وفاه..وكانوا متنوعين بصراحه..وربنا وحده هو اللي بيستر..